صبري سعد بطل فيلم همام في أمستردام يكشف سبب هجرته لهولندا منذ السبعينيات
كشف الفنان صبري سعد بطل فيلم همام في أمستردام سبب هجرته إلى هولندا منذ فترة السبعينات، مشيرًا إلى أنه تعرض لموقف غريب من نوعه أثناء وجهته للجامعة.
وقال صبري سعد من خلال تصريحات صحفية في سنة 78، كانت الناس بتبص لبعضها، وكنت بسشور شعري، وفي مرة راكب أتوبيس رايح الجامعة ولابس قميص مشجر وكنت شايف نفسي، ولكن مكنتش خارج نطاق المبادئ والمنطق، ولكن كنت عايز أعبر عن نفسي، ولقيت واحد في الأتوبيس باصصلي وراح قايلي أنت عامل فيها عبد الحليم حافظ وضربني بالقلم.
وأضاف: استغربت جدًا؛ لأني لا أعرفه ولا قابلته قبل كده ولا كلمته حتى، مجرد واحد غريب واقف في الأتوبيس بص معجبوش منظري وتعدى على حريتي الشخصية، والقلم ده سببلي مفاجأة فظيعة، سكت ومردتش، وأول محطة نزلت فيها من الأتوبيس وقررت مروحش الجامعة ورجعت البيت مشي، ووأنا بتمشى قولت أنا هسافر وهمشي وماليش قعاد هنا.
ومن جهة أخرى، دعم صبري سعد القضية الفلسطينية، وأردف: اللي بيحصل ميتسكتش عليه، أنا طول عمري مغموس بالقضية الفلسطينية من ساعة ما اتولدت، وهنفضل نتكلم، أنا عملت مسرحية عن القضية الفلسطينية وعن ياسر عرفات -رئيس فلسطين السابق- وعن النهب اللي بيحصل من سنة 1948 لحد دلوقتي، وأرض فلسطين ميتسكتش عنها.
