حازم إمام: فتوح ميقدرش يلعب 90 دقيقة.. وعلى أي أساس فيتوريا هيسمع كلامي؟

تحدث حازم إمام عضو مجلس إدارة اتحاد الكرة المصري، عن الاستعدادات الأخيرة لمنتخب مصر، قبل خوضه غمار منافسة بطولة كأس أمم إفريقيا كوت ديفوار 2023.

تصريحات حازم إمام

وقال حازم إمام في تصريحات تليفزيونية: استبعاد ثلاثي منتخب مصر حسين الشحات وإمام عاشور وطارق حامد، كان لعقابهم وليس لوجهة نظر فنية، والدليل أن إمام موجود في المعسكر الحالي، وعمومًا بشكر اللاعبين على الروح والمشوار العالي والالتزام.

وواصل: أي اختيار فني خاص لفيتوريا فقط.. وانضمام محمد صبحي وأحمد فتوح من اختيار فيتوريا لا أحد غيره.

وتابع حازم إمام: أحمد فتوح ميقدرش يلعب 90 دقيقة كاملة حاليًا، ومحتاج يتمرن أكثر وهو كان بيتمرن مع الزمالك.

وأكمل تصريحاته، كاشفًا عن حقيقة تدخله في اختيارات فيتوريا، قائلًا: ممكن أتناقش مع فيتوريا بيني وبينه، لكن مينفعش أبقى ضده في الإعلام، وأي حد لعب كورة على المستوى الدولي هيبقى عارف كل حاجة، وإنت كمشجع مختلف عن المسؤول، وهو في التدريب أحسن مني بكتير فليه هيسمع كلامي في اختياري للاعيبة.

وأردف: محمد صلاح كلامه معايا على طول على اللاعيبة وأنه عاوزهم في حالة كويسة ومش عاوز حاجة لنفسه، وكل همه المنتخب، ومش هو بس كمان دا حجازي والنني والحارسين أحمد ومحمد الشناوي.

وزاد حازم إمام في تصريحاته: كنا منظمين جدًا في المعسكرات، والحمد لله عملنا ماتشات ودية في كل التوقفات، وتصنيف المنتخب زاد وده هدفنا على طول.

واختتم: الزمالك في قلوبنا دايمًا ومش لازم يكون في القمة، يكفي إنه في قلوبنا، وبطولة كأس الرابطة فرصة للأندية إنها تجرّب لاعبين وتلعب بناشئين، ومقدرش أعلّق على اعتذار الأهلي والزمالك، لكن كل فريق أدرى بظروفه وأنا عمري ما هنظّر على حد، لكن بكل تأكيد كنت أتمنى يلعبوا.