هاني شنودة: نجيب محفوظ هاجمني في بداية حياتي وشفت جهاز غريب في أوضة نوم عبد الوهاب

هاني شنودة، قال الموسيقار هاني شنودة: "الأديب الراحل نجيب محفوظ انتقدني وهاجمني قبل ما يأخد جائزة نوبل، ولما قعد معانا في حفل فرقتنا بالإسكندرية قال إيه اللي أنتو عاملينه ده، أنتو زوبعة في فنجان، فقلت له أنت جاي علشان تقول لنا الكلمتين دول وتمشي".

رد هاني شنودة على نجيب محفوظ

وأضاف خلال لقائه ببرنامج "يحدث في مصر" الذي يقدمه الإعلامي شريف عامر بقناة "إم بي سي مصر": "لما هاجمني نجيب محفوظ كنت لسه في بداية حياتي وطبعي إني أدافع عن نفسي علشان كده رديت عليه لإن دي تمس كرامتي، أنا اتهاجمت الأول وبعدين قلت له يعني أنت جاي إسكندرية تعمل إيه".

ذكاء عبد الوهاب

وتابع: "أنا عادتي إني أنام بدري، ولما يكون عندي حفلة بنام الظهر، واتعلمت من محمد عبد الوهاب أن يكون عندي نظام في حياتي، قد إيه موسيقار الأجيال كان ذكي جدًّا ولما دخلت أوضة النوم عنده كان فيه جهاز فبصيت على الجهاز وقتها سألني وقال لي أنت معندكش جهاز زي ده فقلت له ده بيعمل إيه رد على أنه بيعقم جو الأوضة".

اللحن الزنان لنجاة

وأشار:"محمد عبد الوهاب لما سمع اللحن الرنان اللي عملته لنجاة، لعبته مرة واحدة وقلت له انا زهقت ومش هالعبه تاني قال لي براحتك يا حبيبي وكان ذوق جدًّا ونفاخر به الأمم، قال لي أنا عارف انك مختلف ومميز وفنان في التوزيع مش تقليدي".

في وقت سابق، قال الموسيقار هاني شنودة: "نفسي أعمل أغنية لنجاة بمزيكا جديدة وبشكل جديد، بعد العمر ده طبعًا مع إني عارف إنها ما بتغنيش النهارده".

أمنية هاني شنودة

وأضاف خلال لقائه ببرنامج "أسرار النجوم" المذاع على إذاعة "نجوم إف إم": "فيه 4 نجمات مقدرش أرفض إني أعمل لهم أغاني وهن مي فاروق وأنغام وشيرين عبد الوهاب ونجاة".

أغنية بحلم معاك

ولفت هاني شنودة: "أغنية بحلم معاك، هتقعد إلى أن يرث الله الأرض ومن عليها، وفيها كمية هارموني ما حصلتش، وأنا بوفق المزيكا للصوت والأداء بتاع المطرب".

أعمال هاني شنودة

وأشار: “محسن جابر لديه كل أعمال فرقة المصريين وكل أعمال الموسيقى التصويرية الخاصة بي”.