إبراهيم حسن عن محمد صلاح: مفيش أي مشكلة معاه بس هيشيل معانا هنشيله فوق دماغنا (فيديو)
حسام حسن ومحمد صلاح، كشف الكابتن إبراهيم حسن مدير منتخب مصر، موقف العميد حسام حسن المدير الفني للمنتخب الوطني، من نجم نادي ليفربول والفراعنة محمد صلاح.
قيمة محمد صلاح
وقال إبراهيم حسن خلال مداخلة هاتفية ببرنامج "كان أبيدجان" المذاع على قناة "سي بي سي": "المحترفون وعلى رأسهم محمد صلاح قيمة كبيرة جدًّا، ومش عارف ليه الناس عايزة تعمل قلق في أي حاجة".
رؤية حسام حسن لمستقبل محمد صلاح
وأضاف: "محمد صلاح لاعب هايل ولما كنا ماسكين نادي الزمالك كنا عايزينه، رؤيتنا كانت في محلها لأنه بعد كده عمل تاريخ وبقى حاجة كبيرة جدا لمصر، فأي لاعب له قيمة زي محمد صلاح والمجموعة الموجودة من المحترفين محتاجينهم يشيلوا المنتخب الفترة الجاية وكل لاعب مهم لازم يبقى له وضعه وطالما بيؤدي في الملعب وبيجتهد وبيفيد المنتخب هنشيله فوق دماغنا سواء أكان محلي أو محترف".
وتابع:"أنا وحسام حسن بنطير بأي لاعب يشيل الفرقة ولما يبقى عندك محمد صلاح بقيمته واللعيبة الكبيرة التانية المحترفة اكيد هيدعموا الفرقة، لكن في النهاية احنا مش بنفرق بين لاعب واَخر ومبنحبش ندلع حد وبنعطي لكل واحد قيمته والتقدير لأي لاعب يشيل معانا".
رسالة حسام حسن لمحمد صلاح
وواصل: "ما دام محمد صلاح هيشيل معانا المنتخب أنا وحسام حسن هنشيله فوق دماغنا بس من غير دلع ولكن بالمجهود والتعب في الملعب واحنا مش بنفرق بين لاعب وآخر، كل اللي عايزينه في اللاعيبة يبقى فيه شراسة وقوة وحماس واجتهاد في الملعب والشارع عايز كده، عايزين لاعب قلبه قوي وعنده حمية علي قميص المنتخب".
واستطرد:"الواحد بيبقى سعيد انه عنده لاعب بقيمة محمد صلاح، والناس عايزين يعملوا مشاكل بنقول لهم هيبقى فيه تواصل مع صلاح وتريزيجيه وكل الناس ومش هنجيب حد إلا لو جاهز وقادر يفيد المنتخب، ومفيش بينا أنا وحسام وأي لاعب أي مشكلة، بقول للناس اللي عايزين خراب احنا محتاجين نصفى النوايا ومفيش أي مشكلة بيننا وبين صلاح".
وأردف:"لما نقول أن اللاعب كان قليل أو مش في مستواه لا تقلل منه ومش شتيمة، ومحمد صلاح وكل اللاعبين المحترفين والمحليين مهمين جدًّا وما بنفرقش في شغلنا بين لاعب والتاني إلا بالمجهود وكل الحب والتقدير للاعبين وكلهم في حضننا لإننا عايزين نعمل حاجة لبلدنا وللجمهور المصري ونعمل حاجة تليق باسم مصر وعلشان كده مطلوب نصفي النوايا".
